ВКХ: муҳлати эътибори раводид ва бақайдгирии шаҳрвандони хориҷӣ, ки муваққатан дар ҳудуди Тоҷикистон қарор доранд, тамдид мешавад

  Бо дарназардошти ҳамагирии коронавируси COVID-19 ва вазъи бавуҷудомадаи эпидемиологӣ, муҳлати эътибори раводид ва бақайдгирии шаҳрвандони хориҷӣ ва шахсони бешаҳрвандӣ, ки муваққатан дар ҳудуди Ҷумҳурии Тоҷикистон қарор доранд, то ба эътидол омадани вазъ тамдид мешавад. 

Шаҳрвандони хориҷӣ ва шахсони бешаҳрвандӣ барои тамдиди раводид метавонанд ба Сарраёсати консулии Вазорати корҳои хориҷӣ, намояндагии Вазорати корҳои хориҷӣ дар вилояти Суғд ва ҷиҳати тамдиди муҳлати бақайдгирӣ ба воҳидҳои сохтории Хадамоти шиносномавию бақайдгирии Вазорати корҳои дохилии Ҷумҳурии Тоҷикистон муроҷиат намоянд.

Бояд таъкид кард, ки тамоми дархостҳои шаҳрвандони хориҷӣ ва шахсони бешаҳрвандӣ мувофиқи тартиби муқарраргардидаи қонунгузории мамлакат мавриди баррасӣ ва иҷрои фаврӣ қарор дода мешаванд.