Таҷлили Рӯзи Президент дар Маркази мероси хаттӣ

  15-уми ноябр дар толори Маркази мероси хатии АИ ҶТ ба муносибати Рӯзи Президенти Ҷумҳурии Тоҷикистон маҷлиси тантанавӣ баргузор гардид.

  Маҷлисро директори Маркази мероси хаттӣ, доктори илмҳои филологӣ ва узви вобастаи академияи илмҳои Ҷумҳурии Тоҷикистон Ҷӯрабек Назриев ифтитоҳ намуда, дар бораи зарурати таҷлили Рӯзи Президент ва хадамоти Эмомалӣ Раҳмон-асосгузори сулҳу ваҳдати миллӣ, пешвои миллат дар амри таҳкими давлатдории миллии тоҷикон суҳбати пурмазмун ироа намуд.

  Сипас, Раҳматулло Абдуллоев-котиби илмии Марказ дар мавзӯи “Рӯзи Президент-рамзи ваҳдату ягонагии халқу давлат” суханронии муфассале эрод карда, таърихи пуршебу фарози ташкили институти президентӣ дар Ҷумҳурии Тоҷикистонро барои ҳозирин шарҳу тавзеҳ дод.

  Дар маҷлиси тантанавӣ ҳамчунин Алии Муҳаммадии Хуросонӣ-мудири шуъбаи матншиносӣ, таҳқиқи ва нашри мероси хаттӣ ва Асрори Раҳмонфар-муовини директори Марказ оид ба илм суханронӣ ва дар иртибот ба Рӯзи Президент шеърҳои тозаэҷоди худро қироат намуданд.

                  Асрори Сомонфар            
  Пешвойӣ ҳадяи халқу Худост...
 
Пешвойи  миллате  будан на осон асту бас,
Ин мақом арзандайи Инсони шоён асту бас.
 
Пешвой  ҳадяи халқ асту иҳсони Худо,
Ҳар ки шаккаш оварад, нопухтаимон асту бас.
 
Нафканад то соя касро бар сараш мурѓи ҳумо,
Бар сарири салтанат ӯро на имкон асту бас.
 
Тӯдаеро раҳнамо будан бувад сахт озмо,
Тӯдакаш будан сазойи марди майдон асту бас.
 
Розу нози ҳамватанро рӯзу шаб бардоштан
Хоси фардони наҷибу роду фарзон асту бас.
 
Халқу кишварро ҳимоят кардан аз хасму хатар
Кори гурдону ялону ардашерон асту бас.
 
"Корвони умрамон аз роҳи мушкил меравад",
Сорбони оқил онро ҷодагардон асту бас.
 
Бори дигар омад Исмоъили Сомон падид,
Аз ниҳоду бӯтаву бунёди Сомон асту бас.
 
ӯ забони модариро боз бар курс нишонд,
Лоҷарам, мероси боборо нигаҳбон асту бас.
 
Фарраманди рӯйи олам кард Наврӯзи  Аҷам,
Аз «Фалак»  то  «Шашмақом»  ӯро  санохон  асту бас.
 
Пешво пазруфташ аз ҷон тоҷики рӯйи ҷаҳон,
Бемуҳобот, ӯ сазовори чунин шон асту бас!
 
Дур дорад аз балоҳо Сарвари моро Худо,
Дурбину бихраду солори даврон асту бас!